kia tuka nkaka zau ko. Mpila mosi mu ndonga ye vidis'e nding'a nsi au yi mpila yoyo mpe ndonga ya vidisil'e ngenda za mvila zau muna a tuka: a vil'e mvimba s'esi mavata ma nene, a konda nsanda mumu nsi a vwidi kadi k'a zeye kun'a tuka ko.
E mvila yovo ngenda, yi nsinga wa zingan'e kanda dia wonsono, mbuta ye a leke vo wa kaka vo na Ntumb'a mvemba yi luvila ka tenge, e ndion'e muntu wa kanda dia eno kulu luna muna menga ma Ntumb'a mvemba, ka fwete ki sunzula ye kund'e konzo kwa tata na Ntumb'o teng'e ngenda vena kena.
Tuvovele vo vena ye ngenda kumi ye zole za tuka yo vo za vayika muna Kongo Dia Ntontila yi zazi:
1) Vuzi Dia Nkuwu
2) Mpanzu A Nsaku
3) Ntumb'a Mvemba
4) Nakongo Na Lumbu
5) Nsaku Na Vunda
6) Nzambu A Mpakasa
7) Mpondi A Wala
8) Nkonzo A Mvemba
9) Na Vela
10) Nanga'a Kongo
11) Nkang'a Mvika
12) Kinkaza
E ngenda zozo muna za yenda, za wutana, za yandangyana mu zunga ya wonso ya nsi a kongo, yi kuma konso tini kia lwakanga mwisi kongo vo ka tang'e luvila lwa s'andi ye lwa kanda ka fwete toma tambulwa ye sanswa mu nsansw'a mbote muna vata bosi e kinzenza mpe kimene.
Kadi muna vata diodio vo dia luvila lwa ki se kiani, ka fwete siwa va fulu kia ki mwana kondwa kwa wonga ngatu vo lukatikisu. O vo se betela ye luvila lwa kanda, se ka fwete siwa va fulu kia nkwa kanda nze se sia vo momo vata nkutu mu ka wutukila ngatu vo mu ka zingilanga.
Mu kuma kia toma kwa wutama ye yandana kwa kwingi, mambu mpe ma tombok'e lutangu muna mavata, nzonza mia kota mu kuma kia mfwuilu, ngelelo ye mambu ma yindoki. Wantu a yantik'e tinana ye vambul'e vumu ye ma vata nkutu. Mpambani zozo za yantik'e kotesa nkumbu za yi mvila--mvila ya mpa ya tuka mu mvila za tuk'e mu Kongo Dia Ntotela. E mpambani ye kun'a tuka mu tin'e mambu, ya toma sobanesa nkumbu za mvila yovo ngenda za makanda mu mbalukilu a ndinga mu konso zunga e nkumbu a luvila mpe ya sobanga. E luvila lu mosi lu lenda wutana ye vambuka mu mvila za yingi zi ki swaswanesananga muna tini ki mosi kia nkumbu. Nze yi wau, kuna kwa tukwa, e Ntumb'a Mvemba ye Nkozo a Mvemba luvila lu mosi lwa kele, kansi muna mambu ka ma mbumb'a nzo ko, ku mosi se ma tadilwanga muna zina dia sia vo a wonsono esi Kimvemba. Kadi o Nkozo wa Mvemba o Ntumba mpe wa Mvemba yi kuma vo muna ntangu yina, a telelwanga vo esi kimvemba.
Kuma tuktu dia zingu kia esi kongo, ka kwa kalanga muntu wa kondele luvila ko, ka kwa kele mpe muntu wa kele ye nkumbu ya kondwa nsasa ngatu nsoselo ko. E nzenza muna nkumbu ye ndinga yi za sobanesenwanga ye ntungi muna ma vata ye zunga ya Kongo.
